Ater in Bia a um cia. Cu Bia cu Pathian sin ah a um; Pathian a si....Bia cu minung ah aa ser i kan sin ah khua a sa.

Bawipa caah ramcar chung ah lam pakhat sial u! Kan Pathian caah thatse ram i lam cu sial u. Horkuang vialte chilh an si lai i tlang vialte chimh an si lai. Tlang cu rawn ah an cang lai i hmun bingbo cu rawn didiai in an um lai. Cun Bawipa sunparnak cu a lang lai i mi vialte nih an hmuh lai. Is 40:3-5

Vancungmi a sin ah a rung i. “Na cung ah daihnak um ko seh. Bawipa cu na sinah a um i thluachuah tam piin an pek,” tiah a ti. Vancungmi bia a theih tikah Mary cu a lau ngaingai i a bia cu a sullam zeidah a si hnga tiah a khuaruah a har. Vancungmi nih cun, “Mary, na thinphang hlah. Zeica’h tiah Pathian nih nangmah cu vel a’n ngeih. Nau na pawi lai i fapa na hrin lai i a min ah Jesuh na sak lai. Amah cu milian mingan a si lai i Cungnung Bik Pathian fapa tiah ti a si lai. Amah a hringsortu Siangpahrang David bawi ṭ hutdan kha Pathian nih amah cu a pek i Jakob tefa hna siangpahrang zungzal in a si lai, a pennak cu zeitikhmanh ah a dong lai lo,” tiah a ti.

Josef cu Galilee ram i Nazareth khua in Judea ram i Bethlehem an timi, Siangpahrang David chuahnak khua ah a kal. Cu minthlak i a kal ah cun a hammi Mary cu a sinah aa kalpi. Mary cu a nithla a tling dengmang i…

Mahka i an um lioah cun aa ṭ hen caan a phaan, fapate a hrin i a fater a si. Puan in a zual i caw rawl einak kuang chung ah a thlim — riahnak khualbuk ah an caah hmun a um lo.

Cuka hrawngah cun, an tuurun a zohkhenh i ramlak i a riakmi tuukhal an um. Bawipa vancungmi an sinah a lang i Bawipa sunparnak cu an velchum ah a ceu. An thin a phang tuk hringhran. Vancungmi nih cun, “Nan thinphang hlah u; nan sin i ka rat cu nan ca i thawng ṭ ha he a si, cu thawng ṭ ha nih cun mi vialte sin ah lunglawmhnak a tlunter lai. Tuzan hrimhrim ah hin David khua chung ah nan Khamhtu a chuak cang — Khrih Bawipa cu!

Tukhaal pawl cu, “Bethlehem khua ah cun kal usi law Bawipa i a kan chimhmi thil cu va zoh tuah usih!” an i ti.

Khulrang in an kal i Mary le Josef cu an va ton hna i bawhte cu caw rawl einak kuang chung i a rak ih ko an va hmuh.

Jesuh... a chuah tlawmpal ah cun arfi zohthiam nichuahlei in Jerusalem ah an ra i, “Judah siangpahrang a si dingmi ngakchia a chuakmi cu khoika’h dah a um? A arfi nichuahlei i a chuah kan hmuh i amah biak ah cun atu hi kan ra,” an ti.

Cu bia cu Siangpahrang Herod nih a theih tikah a awlok a chong ngaingai i…nichuahlei mifim hna cu athlite in a kawh hna i zeitik set ah dah arfi a chuah tiah fiang tein a hal hna. Cun Bethlehem khua ah a kalter hna i, “Va kal u law ngakchia kong cu ṭ ha tein va hlat u; cun nan hmuh tikah ra ka chim ṭ han u law kei zong amah cu ka va bia ve lai,” tiah a ti hna.

Siangpahrang i a ti hna bang cun an kal; cun nichuahlei i an rak hmuh cangmi arfi cu a lang ṭ han i…

...an hmaiah a kal i ngakchia umnak cungah cun a dir. Arfi an hmuh ṭ han caah cun an i lawm tuk hringhran.

Inn chung ah an vung lut i ngakchia cu a nu Mary sin ah cun an vung hmuh. An khuk an ibil i an biak. Cun an zal chung in laksawng an ichuah i an pek. Cu an laksawng cu sui le frankinsen zihmui le mura zihmui an si.

Jerusalem khua ah mipa pakhat, a min Simeon a simi a rak um. Mi ṭ ha le Pathian a ṭ ihmi a si i Israel khamhnak ding a rak hngakmi a si. Thiang Thlarau nih a umpi i Thiang Thlarau nih cun ‘Bawipa biakamhmi Messiah na hmuh hlanah cun na thi lai lo’ tiah a ti.

Thlarau hruainak in Simeon cu Biakinn ah cun a lut. Ngakchia Jesuh cu a nu le a pa nih…biakinn chung i an luhpi tikah, Simeon nih cun a rak pom i Pathian cu a thang ṭ hat; “Nihin ah hin, maw Bawipa, nangmah nih na salpa cu dai tein ka rian na ka limter cang, Atu cu na biakam a tling cang. Zeica’h tiah miphun vialte zohchih in khamhnak ding na rak timhmi cu ka mit hrimhrim in ka hmuh cang; Cu cu Jentail mi hna caah na lam a langhtertu a simi ceunak le na mi Israel mi hna ca i sunparnak cu a si,” tiah a ti.

Bawipa vancungmi pakhat cu Josef sinah a mang ah a lang i, “Tho law, nau le a nu hi ikalpi hna law Izipt ram ah va zaam u. Cun ‘chuak cang u’ ka’n ti hna hlantiang cuka ah cun va um u. Herod nih ngakchia hi thah in a kawl lai,” tiah a ti.

Josef cu a tho i nau le a nu cu Izipt ram i zampi ding cun zan ah a thawhpi hna. Cuka ah cun Herod a thih tiang an um.

Bawipa nawlbia i nan tuah awk a si tiah a timi vialte an tuah dih in Galilee ram i an umnak an khua Nazareth ah an kir ṭ han. Ngakchia cu a hung ṭ hang i a hung ṭ hawng; fimnak in a khat i Pathian thluachuah a cung ah a um.

Pathian cu kan sin ah a um.

Bawipa chuah lawmhnak kan sin ah um ko seh. cacc.info 2007/12/16